.gif)
कञ्चनपुर । सुदूरपश्चिमको कञ्चनपुर जिल्लामा यस वर्ष गहुँ उत्पादनमा सुधार आएको छ। कृषि ज्ञान केन्द्र कञ्चनपुरका अनुसार गत वर्षको तुलनामा यस वर्ष गहुँको उत्पादकत्वमा २.१ प्रतिशतले वृद्धि भएको छ। केन्द्रका सूचना अधिकारी धर्मबहादुर साउदले उन्नत जातको बीउबिजनको प्रयोग र सिँचाइ सुविधाको विस्तारका कारण उत्पादनमा सकारात्मक प्रभाव परेको जानकारी दिएका छन्। यस वर्ष जिल्लाभर ३१ हजार २१० हेक्टर क्षेत्रफलमा गहुँ खेती गरिएकोमा कुल १ लाख ६ हजार ११४ मेट्रिक टन उत्पादन भएको छ, जसअनुसार प्रतिहेक्टर उत्पादकत्व ३.४ मेट्रिक टन पुगेको छ।
उत्पादन वृद्धि हुनुमा किसानहरूलाई सहकारीमार्फत ५० प्रतिशत अनुदानमा उपलब्ध गराइएको उन्नत बीउ र कृषि प्रविधिमा बढेको पहुँचलाई मुख्य श्रेय दिइएको छ। त्यसैगरी, महाकाली सिँचाइ आयोजनाको पहिलो र दोस्रो चरणमार्फत ११ हजार ६०० हेक्टरमा पुगेको सिँचाइ सुविधा र खेतीको समयमा रासायनिक मलको उपलब्धताले पनि उत्पादन बढाउन मद्दत गरेको हो। जिल्लामा कुल १ लाख ६१ हजार ७४१ हेक्टर खेतीयोग्य जमिन रहे तापनि हाल निश्चित क्षेत्रमा मात्र गहुँ खेती भइरहेको छ। क्षेत्रफल विस्तार नभए पनि आधुनिक खेती प्रणाली र सिँचाइको उचित व्यवस्थापनले गर्दा उत्पादकत्वमा भने निरन्तर सुधार आइरहेको ज्ञान केन्द्रले जनाएको छ।
